Vətəndaşlıq vəziyyəti aktlarının dövlət qeydiyyatı
1. Doğumun qeydə alınması
Xarici ölkədə Azərbaycan Respublikasının vətəndaşı doğulduqda Azərbaycan Respublikasının xarici ölkələrdəki diplomatik nümayəndəlik və konsulluqlarında doğumun dövlət qeydiyyatı aparılır.
Doğumun qeydə alınması üçün uşağın doğulduğu gündən ən geci 1 ay ərzində, uşaq ölü doğulduqda isə ən geci doğum vaxtından ötən 3 gün müddətində müraciət edilməlidir.
Üzrlü səbəblər olmadan doğumun qeydə alınması üçün nəzərdə tutulmuş müddətdə müraciət olunmamasına görə uşağın valideynləri inzibati məsuliyyət daşıyırlar.
Doğumun qeydə alınması üçün tələb olunan sənədlər:
Doğumun qeydə alınması üçün müraciət edən şəxs tərəfindən Azərbaycan Respublikasının xarici ölkələrdəki diplomatik nümayəndəlik və konsulluqlarına aşağıdakı sənədlər təqdim edilməlidir:
- doğumun qeydə alınması haqqında ərizə;
- valideynlərin şəxsiyyətini təsdiq edən sənədlər(şəxsiyyət vəsiqəsi, pasport);
- valideynlərin doğum haqqında şəhadətnamələri;
- valideynlərin nikah haqqında şəhadətnaməsi;
- doğum faktını, vaxtını və yerini təsdiq edən tibb müəssisəsindən sənədin əsli;
- uşaq tibb müəssisəsindən kənarda doğulduqda doğuma kömək göstərmiş və ya doğuşdan sonra valideynlərin müraciət etdiyi həkimin verdiyi sənəd;
- Doğumun qeydə alınması üçün müəyyən olunmuş 1 aylıq müddət keçdikdə uşağın sağlamlığı barədə həkim arayışı.
- uşaq ölü doğulubsa, onun ölü doğulması barədə həkimin verdiyi sənəd.
Bununla yanaşı, şəxsin Azərbaycan Respublikasının vətəndaşlığına mənsubiyyətinin müəyyən edilməsi üçün tələb olunan sənədlər Səfirliyin Konsulluq bölməsinə təqdim edilməlidir.
İştirak etməli olan şəxslər:
- valideynlər və ya onlardan biri;
- valideynlər üzrlü səbəbə görə müraciət edə bilmədikdə qohumlar, uşağın doğulduğu tibb müəssisəsinin müdiriyyəti və yaxud notariat qaydasında təsdiq olunmuş etibarnamə əsasında səlahiyyətli şəxslər.
Qeyd 1: Qanunvericilikdə nəzərdə tutulmuş müddət keçdikdən sonra doğumun qeydə alınması üçün valideynlər və ya onlardan biri müraciət etməlidir;
Qeyd 2: Nikahı olmayan anadan doğulmuş uşağın doğumunun qeydə alınması üçün ana şəxsən və ya onu etibarnamə əsasında təmsil edən nümayəndəsi vasitəsilə müraciət edə bilər
Dövlət rüsumu:
“Dövlət rüsumu haqqında” Azərbaycan Respublikasının 2001-ci il tarixli Qanununun 13-cü maddəsinə əsasən, doğumun qeydə alınması və doğum haqqında ilkin şəhadətnamələrin verilməsi üçün dövlət rüsumu tələb olunmur.
***
2. Ölümün qeydə alınması
Xarici ölkələrdə yaşayan və ya səfərdə olan zaman şəxslər vəfat etdikdə onların ölümünün qeydə alınması Azərbaycan Respublikasının diplomatik nümayəndəlik və konsulluqları tərəfindən aparılır:
Ölümün qeydə alınması üçün ölmüş şəxsin qohumları, qonşuları, habelə ölümün baş vermiş olduğu təşkilatın müdiriyyəti və ya başqa şəxslər bu barədə Azərbaycan Respublikasının diplomatik nümayəndəlik və ya konsulluğuna məlumat verməlidirlər.
Eyni zamanda, ölüm faktı haqqında müvafiq xarici ölkənin (yerin) tibb müəssisəsinin sənədi ilə (ölüm haqqında həkim arayışı, ölüm haqqında feldşer arayışı ilə) təsdiq edilməlidir.
Belə məlumat və təsdiqləyici sənəd ölümün baş verdiyi və ya meyitin tapıldığı vaxtdan on gündən gec olmayaraq təqdim edilməlidir.
Şəxsin ölüm vaxtı (tarixi) kimi - ölüm faktı haqqında müvafiq xarici ölkənin (yerin) tibb müəssisəsinin sənədində (ölüm haqqında həkim arayışı, ölüm haqqında feldşer arayışı) göstərilən tarix qəbul olunur.
Ölümün qeydə alınması üçün tələb olunan sənədlər:
1. ölümün qeydə alınması haqqında şifahi müraciət və ya yazılı ərizə;
2. ölmüş şəxsin şəxsiyyətini təsdiq edən sənədlər:
- vətəndaşın pasportu,
- dənizçinin şəxsiyyət sənədi,
- şəxsiyyət vəsiqəsi,
- hərbi bilet,
- sürücülük vəsiqəsi.
3. ölüm faktı haqqında müvafiq xarici ölkənin (yerin) tibb müəssisəsinin arayışı / ölüm faktının müəyyən edilməsi haqqında və ya vətəndaşın ölmüş elan edilməsi haqqında məhkəmə qətnaməsi.
Dövlət rüsumu:
“Dövlət rüsumu haqqında” Azərbaycan Respublikasının 2001-ci il tarixli Qanununun 13-cü maddəsinə əsasən, ölümün qeydə alınması və ölüm haqqında ilkin şəhadətnamələrin verilməsi üçün dövlət rüsumu tələb olunmur.
